Մամուլը մեր մասին

Մամուլը մեր մասին

15․05․2018 Ստեփանակերտի Գրիգոր Նարեկացի Համալսարանին Մէջ Արեւմտահայերէնի Հայագիտութեան Գիտահետազօտական Կեդրոն Բացուեցաւ

հղում

Ստեփանակերտի Գրիգոր Նարեկացի համալսարանին մէջ, Մայիս 11ին տեղի ունեցաւ ամերիկահայ Լութովիկա եւ Յակոբ Այնթապլեաններու անուան արեւմտահայերէնի, հայագիտութեան գիտահետազօտական կեդրոնի բացման արարողութիւնը:

Մինչ կեդրոնին բացումը, Արցախի կրթութեան, գիտութեան եւ մարմնակրթութեան նախարար Նարինէ Աղաբալեան, Գրիգոր Նարեկացի համալսարանի տնօրէն Վարդան Յակոբեան, Հայաստանի Գրողներու միութեան նախագահ Էդուարդ Միլիտոնեան, Հայաստանէն ժամանած հիւրերը եւ համալսարանի դասախօսները ծաղիկներ խոնարհեցին Գրիգոր Նարեկացիի հարթաքանդակին դիմաց:

Կեդրոնի բացման պատիւը տրուեցաւ Վարդան Յակոբեանին եւ Արեւմտահայերէնի հայագիտութեան գիտահետազօտական կեդրոնի տնօրէն, Գրիգոր Նարեկացի համալսարանի դասախօս Ամալիա Գրիգորեանին:

Ելոյթ ունեցաւ նախարար Նարինէ Աղաբալեան: Ան յայտնեց, որ գիտահետազօտական բաղադրիչները շատ կարեւոր մաս կը կազմեն կրթութեան մէջ, եւ այս կեդրոնին բացումով՝ Գրիգոր Նարեկացի համալսարանի ղեկավարութիւնը կարեւոր կը համարէ արեւմտահայերէնի ուսուցումը՝ ձեռնարկելով քայլեր ուսանողութիւնը գործընթացին մէջ ներգրաւելու համար:

Ըստ Ն. Աղաբալեանի՝ բարձրագոյն կրթութեան եւ անոր որակի զարգացման հարցերը պիտի շարունակեն ըլլալ ԿԳՄ նախարարութեան ուշադրութեան առարկաները. նախարարութիւնը հետեւողական ջանքեր եւ աշխատանք կ՛ակնկալէ այս կեդրոնի գործունէութենէն:

Նախարարը կեդրոնին նուիրեց Սարգիս արքեպիսկոպոս Ջալալեանցի «Ճանապարհորդութիւն Ի Մեծն Հայաստան» գիրքը:

Վարդան Յակոբեան, իր հերթին նշեց, որ համալսարանին մէջ արեւմտահայերէնի հայագիտութեան գիտահետազօտական կեդրոն բանալը միշտ ալ եղած է իրենց ծրագիրներու շարքին:

Ըստ անոր՝ անցեալ տարի իր հրաւէրով, անուանի գիտնական, բանաստեղծ Յակոբ Այնթապլեան, իր կնոջ՝ Լութովիկայի հետ ժամանեց Արցախ, այցելեց նաեւ իրենց համալսարանը. այնտեղ քննարկուեցաւ Գրիգոր Նարեկացի համալսարանին մէջ Արեւմտահայերէնի հայագիտութեան գիտահետազօտական կեդրոն ունենալու հարցը:

Կեդրոնը յագեցած է անհրաժեշտ գրականութեամբ, ճարտարագիտական միջոցներով, եւ ստեղծուած են պայմաններ աշխատանքները պատշաճ կազմակերպելու համար:

Արեւմտահայերէնի հայագիտութեան գիտահետազօտական կեդրոնի տնօրէն Ամալիա Գրիգորեան, իր հերթին տեղեկացուց, որ նորաբաց կեդրոնին մէջ գրաբար, արեւմտահայերէն, արեւմտահայ գրականութիւն, հայկական հարցի պատմութիւն եւ սփիւռքահայ գրականութիւն նիւթերով կը կայանան եռամսեայ դասընթացքներ:

«Ուսուցումը կը տարուի ժամանակակից պահանջներուն համապատասխան: Դասընթացքներուն կը մասնակցին Գրիգոր Նարեկացի եւ Արցախի պետական համալսարաններու ու այլ համալսարաններու ուսանողներ: Դասընթացքները կը վարեն Արցախի, Հայաստանի եւ արտերկրի լաւագոյն մասնագէտներ: Դասընթացքներու աւարտին, ուսանողները համալսարանին կողմէ պիտի ստանան վկայագիրներ», յայտնեց Ա. Գրիգորեան՝ աւելցնելով, որ կեդրոնը պարբերաբար պիտի կազմակերպէ տարբեր ձեւաչափերով հանդիպումներ՝ գիտութեան, արուեստի եւ մշակոյթի նշանաւոր գործիչներու հետ:

15/05/2018

×